小學男生寫信反對老師嫁人　校長真摯回應：讓他知道有人聽心底話

相信絕大部分爸媽都曾經為子女的奇怪舉動，或一句說話而感到驚訝不已，尤其是女兒把口普遍比較早熟，我家女兒言妹，5歲就話要同人結婚，聽其他家長都有類似經歷，乜原來現在的女士咁恨嫁咩？不要緊，但諗起自己聽到阿女一顆恨嫁的心時，我的反應實在相當不堪，我一句就答：「唔得，妳識佢好耐咩？」雖然答得戇居，但爸爸的心情，你懂的。

早一排去聽一間學校的簡介會，校長分享一位小朋友的信，內容是一個小學生寫給校長，講到心愛的老師要嫁人，新郎不是自己，感到傷心不已，甚至想在教堂反對這場婚事，洋洋灑灑寫了一封萬言書，校長不敢怠慢，立即約這位小情聖見面。

或者一般的大人可能只答一句：「小朋友，你幾歲呀？老師年紀大你咁多，算啦。」就咁就當處理左。但呢位校長卻是讚賞這位學生感情真摯，表達清晰，更重要是沒有否定小朋友的一份感情、及不捨得老師出嫁的感受，讓他知道有人願意聽他的心底話，就算不認同他某些做法。

呢位校長更送他一本日記簿，在日記首頁寫上聖經對愛的看法（哥林多前書十三篇：愛是恆久、忍耐，又有恩慈...）鼓勵他每天把情感透過文字抒發出來。

我都不禁反省，有很多時間，我們大人都用大人的角度、大人的理性去回應小朋友，對小朋友而言不單是牛頭不搭馬嘴，更是自己切斷左溝通渠道，因為好似我咁，一句就質疑佢的感情，阿女就再不敢同我提及婚事的進展。

多謝林浣心校長，更加多謝這位勇於去示愛的小朋友，教導我，大人唔好用大人的角度判斷小朋友的感受。

作者簡介︰資深傳媒人，育有一子一女，現時在香港電台第一台《我們不是怪獸》主持環節「怪獸爸爸and friends」，周日晚10點新聞後播出。